50 artistes y grupos del Principáu presentáronse a la convocatoria, una collaboración ente la Conseyería de Cultura, Política Llingüística y Deporte, y esti eventu internacional de la industria musical

El Principáu va entamar en Bilbao una xornada de contactos con profesionales del sector, acompañada d’una muestra de productos de la comunidá y sidra asturiano

28/09/2026.- La banda asturiana Axolotes Mexicanos foi escoyida p’actuar en BIME Bilbao 2026, l’alcuentru internacional de la industria musical que va axuntar na capital vizcaína a artistes, profesionales, programadores y otros axentes del sector del 27 al 30 d’ochobre.

La participación del grupu ye resultáu de la convocatoria promovida pola Conseyería de Cultura, Política Llingüística y Deporte en collaboración cola organización de BIME.

Más de 50 artistes y grupos presentáronse a esta oportunidá y foi l’equipu de programación de BIME Live l’encargáu d’escoyer a esti grupu asturianu, d’espíritu punk y influyencia xaponesa, formáu por Olaya Pedrayes, Juan Pedrayes, Stephen J. Lyne, Lucas de la Iglesia y Mario del Valle. La so participación va dexar a la banda ufiertar una actuación curtia en formatu showcase énte profesionales de la industria musical y va da-y accesu a BIME Pro, l’espaciu profesional onde se van mostrar les tendencies más nueves del sector, que cunta con actividaes de formación y que ye amás puntu d’alcuentru profesional y comercial.

Esta collaboración con BIME Bilbao 2026 forma parte de la estratexa de la Conseyería de Cultura, Política Llingüística y Deporte pa favorecer la profesionalización y promoción esterior de la música asturiana, facilitando la presencia d’esti sector n’alcuentros especializaos qu’abran oportunidaes nueves como’l Showcase Scotland 2027 o’l BIME Bilbao.

Descuentos p’artistes asturianos

La collaboración con BIME va dexar, amás, que profesionales del sector musical asturianu puedan beneficiase d’un descuentu del 50 % nel certificáu presencial de BIME Pro. La ufierta tien como tope 20 places, que se van asignar por orde de solicitú. Les persones interesaes han unviar un corréu electrónicu a  eventos@turismoycultura.asturias.es

Amás, pa favorecer conexones ente los axentes que se dean cita en Bilbao, el Principáu va participar institucionalmente entamando una xornada de networking con profesionales de la industria musical asturiana, onde tamién van probase productos de la comunidá y sidra asturiano.

Un alcuentru internacional de la industria musical

BIME ye un alcuentru internacional de la industria musical que se celebra dende’l 2013 en Bilbao y, dende’l 2022, tamién en Bogotá (Colombia). Nes sos dos sedes axunta a artistes, empreses, instituciones y profesionales de dellos países. La programación combina música en directo, conteníos especializaos y espacios pal intercambéu d’esperiencies y l’establecimientu de contactos profesionales.

L’alcuentru encara los retos que condicionen el futuru del sector y trabaya pa favorecer los fluxos artísticos y profesionales ente Europa y América Llatina. El so propósitu ye xenerar oportunidaes de medría económica, cultural y rellacional p’artistes, profesionales, empreses y públicos vinculaos a la música.

El programa articúlase alredor de BIME Pro, centráu nos retos, tendencies y oportunidaes de la industria, y BIME Live, qu’ufierta conciertos y showcases en dellos escenarios de la ciudá. Estes actuaciones dexen a artistes y formaciones presentar el so trabayu énte programadores de festivales, promotores, representantes, medios de comunicación y otros axentes del sector.