Conciertu presentación del últimu trabayu discográficu de les hermanes Álvarez. Un directu arrollador onde les xixoneses tán acompañaes enriba l’escenariu por trés grandes músicos de la escena musical asturiana: el contrabaxista David Casillas, la baterista Eva Díaz Toca y la pianista Cristina Montull. 

Un conciertu de voces cálides, guitarres envolventes y synthes evocadores qu’adientren al públicu al traviés d’estos cantares nuevos y de temes yá clásicos del grupu como Titubeas, Mi bañera o El mundo se va a acabar nel universu de les hermanes Álvarez; un imaxinariu propiu que medra dende va venti años y que llevó a les xixoneses a ser un referente na escena independiente y a tar consideraes como unes de les meyores lletristes españoles.