El Principáu apoya les obres lliteraries, teatrales y guiones cinematográficos nes llingües propies d’Asturies, asina como la interpretación tradicional de la canción asturiana

El plazu pa presentar les solicitúes acaba’l 20 d’abril

21/03/2025.- La Conseyería de Cultura, Política Llingüística y Deporte convocó los gallardones lliterarios y artísticos que distinguen les meyores obres en llingua asturiana y n’eonaviegu en siete disciplines. Les bases de los premios colos que Cultura apuesta pol usu y promoción de les llingües propies del Principáu, publicáronse güei nel Boletín Oficial del Principáu d’Asturies (Bopa).

El plazu pa presentar les creaciones lliterarias y artístiques va permanecer abiertu 30 díes naturales, hasta’l 20 d’abril. Estos son los reconocimientos convocaos pol Gobiernu d’Asturies:

II Premiu Obdulia Álvarez “La Busdonga” d’Asturianada

Puede concurrir cualquier persona que teniendo participao na categoría femenina, masculina o moza (hasta 22 años) de dalgún de los concursos llocales d’asturianada conseñaos na resolución quedaren seleccionaos o seleccionaes ente les seis persones meyor clasificaes de la so categoría. Más información en https://acortar.link/weBmlE

V Premiu “Enriqueta González Rubín” de narrativa moza en llingua asturiana

Pueden presentase noveles o recopilaciones de cuentos escritos en llingua asturiana, de tema y estructura llibres que seyan inédites, con una estensión mínima de 50 páxines, con al menos 100.000 caractares, non premiaes n’otros concursos y escrites por persones menores de 31 años nel momentu del fin de plazu de presentación de solicitúes. Más información en https://acortar.link/vsvdHf

II premiu de “Guión Cinematográficu” en llingua asturiana o n’eonaviegu

Pueden presentase guiones orixinales y inéditos en llingua asturiana o n’eonaviegu pa llargumetraxes de ficción o animación. Los guiones orixinales y inéditos que se presenten nun pueden rodase dende’l momentu de la presentación na correspondiente convocatoria hasta la resolución. Más información en https://acortar.link/WDrpwL

V Premiu “Florina Alías” a la meyor traducción al asturianu

Trátase d’un reconocimientu a la meyor traducción al asturianu d’obres orixinales escrites nuna llingua diferente de la castellana o del eonaviegu editada (en formatu papel o dixital) y difundida nel añu 2024. Más información en https://acortar.link/MjHt1O

II Premiu “Pachín de Melás” de testos teatrales en llingua asturiana

 Pueden concurrir obres teatrales orixinales escritas en llingua asturiana y que puedan ser representaes con una duración comprendida ente 50 y 90 minutos. Va poder presentase un únicu testu teatral o un conxuntu de pieces breves. Más información en https://acortar.link/k9rNfN

XVII Edición del “Premiu al Meyor Cantar Camaretá”.

Pueden participar músicos solistes o que formen parte d’un grupu musical con un cantar con lletra en llingua asturiana o eonaviegu que fuera editada y difundida a lo llargo del 2024 y hasta la fecha de la convocatoria. Más información en https://acortar.link/ub6IVV

IX Premiu “Nel Amaro” de teatru profesional en llingua asturiana o en gallego-asturianu o eonaviegu.

Pueden presentase empreses del sector profesional dedicaes a la producción y representación d’espectáculos teatrales con obres yá estrenaes y representaes en llingua asturiana o eonaviegu. Más información en https://acortar.link/43wTl6