Piensa en Wilbur ye un espectáculu enllenu d’acrobacies, humor y riesgu, munchu riesgu: la única manera na que Wilbur sabe vivir. Con una técnica y un físicu fuera de lo común, va crear situaciones imposibles que van dexar al públicu ablucao. Acompañáu de los sos amigos inseparables, Contractura, Tirón y Desgarro, va demostranos que l’acrobacia nun ye namás un deporte. Un espectáculu que va impactar nel públicu (lliteralmente).

Víctor Ortiz (1981, Alicante), más conocíu como Wilbur, ye ximnasta, actor y artista de circu. Con namás cinco años, empezó por casualidá nel mundu de la ximnasia artística. Especialista n’aparatos de suelu, saltu y barra, foi perfeccionando la técnica hasta llegar a competir al llau de ximnastes como Gervasio Deferr o Oriol Combarros. A los 16 años, quedó a les puertes del CAR de Madrid, pero decidió siguir entrenando, llegando a proclamase campeón d’España d’acrosport.

Entrenando nel so Alicante natal, conoció al malabarista Piti, col qu’empezó a actuar. Precisamente, el so nome artísticu Wilbur surde 10 minutos primero d’una actuación n’Elche, lleendo panfletos de publicidá. A partir d’esi momentu, decide que la so vida va ser el circu, llegando a formar parte del Cirque du Soleil como acróbata.

Piensa en Wilbur ye’l so primer espectáculu unipersonal. Un show que foi medrando col tiempu y que fixo disfrutar a milenta espectadores. Ello ye que mil y milenta d’ellos síguenlu tamién nes sos redes sociales, nes qu’axunta más de 900.000 siguidores -ente Instagram y TikTok-.