La Cúpula del Centru Niemeyer va acoyer del 21 de marzu al 2 de xunu una gran esposición antolóxica de l´artista alicantina Juana Francés (Alicante, 1924 – Madrid, 1990), pola mor del centenariu del so nacimientu. Producida pol Institut València d´Art Modern (IVAM) y comisariada por una de les sos conservadores, María Jesús Folch, trátase de la mayor esposición dedicada a esta artista fundamental de la plástica española del sieglu XX.

La esposición va axuntar pieces procedentes de los cuatro museos y centros d´arte españoles onde se conserva la so obra: l´IVAM mentáu, el Muséu d´Arte Contemporaneu d´Alicante (MACA), el Muséu Nacional Centru d´Arte Reina Sofía (MNCARS) y l´Institutu Aragonés d´Arte y Cultura Contemporáneos Pablo Serrano (IAACC), amás de delles colecciones privaes, ente les que s´atopa la de los herederos llegales de Juana Francés.

Compuesta por más d´un centenar de pieces, la muestra afonda nos fragmentos estremaos de la so trayectoria buscando poner en valor la figura de Juana Francés como una de les artistes españoles más importantes del sieglu XX, acullá de la so pertenencia al grupu El Paso, del que tamién formaron parte Antonio Saura, Manolo Millares, Rafael Canogar, Luis Feito, Pablo Serrano, Manuel Rivera, Antonio Suárez y Manuel Conde.