El teatru popular asturiau ye un fenómenu sociocultural de primera magnitú pa la cultura del pueblu asturianu y ye ún de los sofitos fundamentales d’espresión de la so identidá.

Esti taller propónse como una iniciación a les téuniques escéniques básiques, ufriendo ferramientes cencielles d’espresión corporal y d’improvisación pa interpretar los tipos propios del teatru popular asturianu. Enraigonaos nos personaxes fundamentales de la "commedia dell’arte" italiana, vieyos carauterísticos, cómicos, namoraos y foriatos son los motores de l’aición dramática asturiana.

Nesta sesión va ufrise un conocimientu básicu de les vertientes que conformen los tipos y personaxes d’esti teatru llariegu, dende’l desendolcu históricu dramáticu y lliterariu, que-yos da cadarma, hasta les téuniques y ferramientes escéniques, que-yos dan forma, pa que los participantes puedan algamar criteriu escénicu pa la interpretación y la comprensión del teatru popular.