N’Asturies los ritos relacionaos cola navidá tuvieron raigaños bien fondos na cultura popular, polo que la nuestra rexón tien personaxes propios, mitos y costumes pa les celebraciones navidiegues, mayormente asociaes al cristianismu pero con un orixe que, tal como recen los estudios fechos a esi respectu, ye precristianu y pertenez al ciclu festivu venceyáu al solsticiu d’iviernu.

Con esti taller la reciella va conocer personaxes, mitos y costumes alrodiu la quema’l nataliegu, los ramos de navidá, los aguilandos y los villancicos tradicionales asturianos. Y van facelo de manera práctica y prestosa preparando pa sigo un ramu de navidá y cantando un aguilandu tradicional. Too ello usando’l cuentu Un nataliegu perbunllidiegu como vehículu conductor.