Si miramos los llibros de textu colos qu’estudien los neños nes escueles y institutos, los únicos héroes y líderes son los homes, los únicos pintores, músicos o escritores son los homes, los únicos científicos son los homes. Eso nun ye verdá, o polo menos nun ye asina del too. Nada de lo que pasó y pasa na historia de los pueblos y les civilizaciones podría tener sucedío ensin el llabor silente de les muyeres. Y amás, en teniendo media oportunidá, les muyeres siempres sacaron a pasear el so remangu, la so decisión, el so valor y el so talentu. Si nun lo ficieron más foi pola bota del patriarcáu que les quería callaes, obedientes y en casa pa sirvir al home; y por ello ye que gastaba munchu esfuerzu y tiempu en convenceles de que yeren seres encantadores pero inferiores.

Asina y too, la historia, mesmo n’Asturies, tienmos dexao un bon garapiellu de muyeres que saltaron a la historia con lluz propio. Ye’l casu d’escritores y filántropes como Xosefa Xovellanos, de filólogues y cuentistes como María Xosefa Canellada, d’ames de casa y revolucionaries como Anita Sirgo, d’iconoclastes como Marica Andayón, d’investigadores como Margarita Salas.

Esta serie de cuentos quier dar a conocer a eses muyeres asturianes que contribuyeron a facer el mundo que tenemos dende les lluces o les solombres de la historia. Les neñes y muyeres anguaño necesiten estes figures onde poder mirase. Los neños y los homes necesiten conoceles entá más pa saber qué sitiu tenemos toos y toes na sociedá y nun cayer en zunes del pasáu qu’entá resquemen nel presente. Los cuentos son obra d’Aique Fernandi y l’ambiente y la música qu’endolquen les histories pónenlos el Dúo Amati.