El llobu de Caperucha Colorada (igual que’l de los trés gochinos, o’l Cuélebre o la Guaxa de les lleendes asturianes) son los malos en boca de los güelos y güeles de tolos tiempos. Pero ellos, los malos, tienen en papu munches coses que pasaron esos díes de los que falen les histories y nun son cómo les dicen los seres humanos. Si escucháremos a toles partes ensin prexuicios, ensin xulgar al otru namás que porque tien más pelo o dientes más grandes que nosotros, igual aforrábemos muncho en disgustos.

Esta serie de cuentos pal públicu de toles edaes en xeneral, y pa la rapacería del primer ciclu de secundaria en particular, quier ayudar a que nun saltemos cola primer versión de cualquier conflictu que nos llegue de la boca del primeru en cuntánoslo. Igual los bonos nun son tan bonos. Igual los malos nun son tan malos. O pue que los bonos seyan los malos o al revés. Seya como seya, lo importante ye escuchar a toos y depués facenos la nuestra propia idea. Los cuentos son obra d’Aique Fernandi y l’ambiente y la música que desenvuelven les histories pónenlos el Dúo Amati.