L´actor y director arxentín Juan Diego Botto va tar acompañáu por Roberto Corte, vinculáu al teatru asturianu como director, autor y collaborador de revistes especializaes n´artes escéniques, con quien va dialogar sobre la so carrera teatral.
Precisamente, Juan Diego Botto Botto va dirixir nel Auditoriu del Centru Niemeyer, el día antes a la so intervención nel Ciclu Palabra, la obra de teatru 14.4, que quier esplorar, dende un llinguaxe escarniadamente realista y, al empar, indisimuladamente llíricu y poéticu, la historia d Ahmed, un neñu qu´escapa del maltratu familiar p´habitar les cais de Tánxer.
La primer apaición del actor y director arxentín Juan Diego Botto nel cine foi a la edá de 8 años na película Juego de poder. Na so carrera profesional compaxinó siempre´l cine y el teatru.
Collechó un gran éxitu nel 2012, con Un trozo invisible de este mundo, y nel 2021 con Una noche sin luna , dambes obres de teatru escrites y interpretaes por él. Nel 2021 ganó´l Premiu Nacional de Teatru pol so fondu y permanente compromisu cola escena como vehículu de tresmisión de realidaes polítiques y sociales incómodes y la so capacidá de faceles llegar al gran públicu al traviés d´un llinguaxe claru y cenciellu pero cargáu de poesía.
Nel 2022 dirixe la so primer película, En los márgenes, con Penélope Cruz y Luis Tosar.