Darío Duarte, fíu d´uruguayos, ye un dramaturgu qu´a los 44 años enfréntase a la so primer estrena na Sala Grande del Teatru María Guerrero.
Cuando fai un cursu col tamién uruguayu Sergio Blanco, esti aconséya-y qu´escriba sobre l´acontecimientu más importante de la so infancia. En 1983, el gobiernu socialista de Felipe González fletó un avión pa que cuasi doscientos fíos d’exiliaos y presos políticos uruguayos viaxaren al so país pa pasar la Nuechevieya coles sos families.

Darío, con cuatro años namás, tuvo nesi avión y visitó a so padre na cárcel. El problema ye que nun recuerda nada. Agora Darío vive en Madrid coles sos dos hermanes. Delmira topa resguardu na kábala xudía y, como psicoanalista, ensaya un métodu novedosu qu´integra los principios lacanianos col árbol de la vida. Dunia sáfase de la realidá diseñando´l so propiu videoxuegu, al empar que va pela vida amarutada del so personaxe favoritu: Yuna en “FinalFantasy X”. Esti entornu de familia disfuncional traumatizada pol exiliu nun ta ayudando a Darío.
Él busca sofitu nel so meyor amigu Dante. Esti ye tamién un dramaturgu brillante, pero sobrepasáu pola frustración que-y provoca´l mediu profesional, arrenunció al teatru pola Psiconeuroinmunoloxía y ta encegoláu por recuperar una manera de vida ancestral.