Esteban Verdeja na categoría masculina, Alicia Villanueva na femenina y Marina Carbajosa na categoría moza recibieron nel 2025 el Premiu Obdulia Álvarez “La Busdonga” d’asturianada.

Esti certame de canción asturiana rinde homenaxe a Obdulia Álvarez Díaz “La Busdonga”, una muyer que nel sieglu XX s’impunxo a los estereotipos de la dómina y destacó pol so estraordinariu talentu musical. L’asturianada, presente na cultura rexonal dende va sieglos, foi un mediu esencial pa la tresmisión oral de tradiciones, costumes y la esencia del paisaxe asturianu. Declarada Bien d’Interés Cultural de calter inmaterial, la so práctica axunta elementos estremaos que la convierten en símbolu d’identidá y cohesión qu’ayuda a fortalecer el texíu social d’Asturies.