La llectura dramatizada apuesta por un formatu híbridu, ente la llectura y la representación, onde la pallabra lliteraria caltién el so protagonismu pero poténciase con recursos escénicos cenciellos: proyecciones de mapes, soníos urbanos, lluz d’oficina, y l’actu mesmu de lleer como xestu teatral. Basada na novela Atlas de geografía humana d’Almudena Grandes, una obra coral qu’esplora la identidá femenina, el pasu del tiempu y la busca de sentíu metanes les contradicciones cotidianes.

La puesta n’escena articúlase alredor d’un gran atles físicu, elementu central y simbólicu, que furrula como exa visual y narrativa, como si’l mesmu mapa xeográficu tresformárese nun mapa emocional y vital. El resultáu ye una esperiencia íntima y reflexiva, que convida al públicu a percorrer los territorios interiores d’estes muyeres —los sos amores, les sos derrotes, los sos descubrimientos—, al mesmu tiempu que revisita con emoción y respetu la voz inconfundible d’Almudena Grandes.