Programa La Cinemateca Ambulante de Llaboral Cinemateca

Esta sesión propón un alcuentru ente delles cineastes d’Asturies, auníes na delegación territorial de la Delegación n’Asturies de l’Asociación de muyeres cineastes y de medios audiovisuales CIMA, p’afianzar la collaboración ente les profesionales del sector y difundir la so obra al públicu asturiano.

CIMA EN CURTIO ye una muestra de curtiumetraxes de CIMA que tien como mira difundir la creación cinematográfica de les muyeres cineastes, averar el so cine al públicu en xeneral y arriquecer el debate sobre l’audiovisual y sobre la sociedá contemporánea dende una perspectiva feminista. 

Campolivar, d’Alicia Moncholí (2024, Documental, 16 min).

Sinopsis: Realidá y imaxinación mécense nun descensu a la infancia de la directora de la que vuelve al últimu espaciu onde tuvo con so padre, la casa de Campolivar.

La vista de las aves acuáticas, d’Irene Menéndez y Jeff El-Eini (2024, Ficción, 15 min).

Sinopsis: Un alcuentru inesperáu cambia dafechu la perspectiva de Lila sobre la so vida de la qu’espera los resultaos d’una prueba médica.

Blood, de Celsa Díaz (2019, animación, 13 min).

Sinopsis: Les vacaciones de Carlos Alejandro en Marruecos convirtiéronse en daqué mui estremao del viaxe de placer esperáu.

Maruja, de Berta García Lacht (2022, Ficción, 15 min).

Sinopsis: María Antonia Bravo García, más conocida como Maruja, vive col so home en San Ildefonso, un barriu de clas obrera de Cornellà, na contorna de Barcelona. Tien 87 años, abúrrese en casa y davezu sal a la cai en busca d’aire fresco que la faiga sonrir, siempre col so carru de la compra.

No jungle, de Carmen Menéndez (2016, Documental, 16 min).

Sinopsis: Un grupu de refuxaos sirios vive nel únicu campamentu improvisáu en Calais acullá de los límites de la “Xungla”, el mayor asentamientu de refuxados n’Europa sobre el que les ONG denunciaron vulneraciones series de los derechos humanos nes condiciones de vida de los sos habitantes. Caltienen la esperanza de cruciar a Inglaterra mentes seres queríos muerren nel intentu. 

La programación cinematográfica ufiertada por La Cinemateca Ambulante ta escoyida pol Festival Internacional de Cine de Xixón (Divertia Gijón S.A.).

Esta proyección faise en collaboración cola Delegación n’Asturies de l’Asociación de muyeres cineastes y de medios audiovisuales CIMA.