Llan de Cubel ye un grupu asturianu de música folk que trabaya sobre la tradición musical asturiana, dándo-y un soníu nuevo. Pa esto, garra material recoyío nos archivos de los grupos asturianos d’investigación etnográfica, amás de lo que saca del llabor complementariu de trabayu de campu fechu por dalgunos miembros del propiu grupu, ensin escaecer los temes más populares conocíos por tolos asturianos.

Dende qu’empezaron en 1984, Llan de Cubel participó activamente nel procesu de revitalización de la cultura tradicional asturiana, contribuyendo tamién a la so divulgación, sobre manera tocante a la música y la llingua. Güei ye quiciás la formación más afianzada dientro del movimientu folk autóctonu, siendo referencia importante pa les xeneraciones nueves.