Luchadoras presenta una selección d´obres de muyeres artistes representaes nes colecciones del Muséu Universitariu d´Arte Contemporaneu de la Universidá Nacional Autónoma de Méxicu (MUAC), la colección publica d´arte contemporaneu mexicanu más grande de Llatinoamérica. El títulu de la muestra ye un homenaxe a una serie famosa de la fotógrafa Lourdes Grobet y, al tiempu, ye tamién una allegoría de les batalles que de contino encaren les muyeres pola igualdá d´oportunidaes y por reorientar la temática, l´espíritu y les espectatives de la cultura.

Baxo una perspectiva de xéneru, esta esposición propón visibilizar y reflexonar de manera crítica sobre la historia recién del arte mexicanu. El puntu de partida ye la producción de muyeres artistes nel arte modernu y contemporaneu. Con obres clave qu´incluyen videu, fotografía, instalación, obres participatives, dibuxu, testil, escultures y pintura en dellos soportes, les artistes denuncien la violencia pa coles muyeres, cuestionen les sos práctiques nel mundu caldía y desafíen los roles y espacios tradicionales asignaos a elles. Pela primer vez, el presente exerciciu curativu pon en dialogu obres que permiten narrar la historia del arte contemporaneu mexicanu dende otres miraes y presenta preguntes que, sofitaes pola teoría feminista, son quien a dar construcciones nueves de sentíu a les practiques artístiques en Méxicu.