La temporada d´ópera acaba en xineru-febreru del 2024 con Lohengrin de Richard Wagner, representada nel Campoamor en 1897 y en 1908, con Francisco Viñas nel rol titular, na nuestra temporada en 1949 y en 1965 y nel Festival de Música d´Asturies en 1983.

La ópera de Wagner forma parte de la triloxía romántica xunto a Der fliegende Holländer y Tannhäuser. Esta obra constituye´l momentu principal y final de la tradición de la ópera romántica alemana del XIX y abre´l camín a un estilu nuevu, el drama musical wagnerianu, coles sos innovaciones estraordinaries tanto nel planu teóricu como nel aspectu prácticu. Les pieces de la ópera tradicional sustituyénse por una corriente musical continua que s’adhier ensin solución de continuidá a l´acción dramática.

Esta obra d´arte total tien momentos sublimes, como´l preludiu del actu primeru, el Suañu d´Elsa, el preludiu del actu terceru o´l famosu racconto de Lohengrin que, col final de la obra, nos somorguien nuna atmósfera máxica.
La producción nueva de la Ópera d´Uviéu va tar dirixida pol maestru alemán Christoph Gedschold, Musikdirector de la Ópera de Leipzig, que dirixó un Götterdämmerung inolvidable en setiembre del 2019. El director d´escena español Guillermo Amaya, mozu formáu n´Alemaña, dirixe l´apartáu escénicu. Un repartu de nivel internacional va dar vida a los personaxes principales de la ópera con cantantes como Samuel Sakker, Miren Urbieta-Vega y Simon Neal. Completen la producción la Orquesta Sinfónica del Principáu y el Coru de la Ópera d´Uviéu.