Entraes escoses

La xira nueva de Rodrigo Cuevas va empezar n’España’l 30 de xunu del 2023 nel Festival (a)phónica catalán, dando empiezu a un percorríu que yá tien confirmaes actuaciones hasta’l branu del 2024 n’América. Ente medies, La Romería, qu’asina se llama, va llegar a la Cruilla de Barcelona, a los Jardines de Viveros de Valencia, a La Mar de Músicas de Cartaxena, a les Noches del Botánico de Madrid, a la Porta Ferrada, al Sonorama... Quién sabe hasta cuándo va tar percorriendo los territorios del mundu...

Un averamientu a San Juan de Puertu Ricu n’abril del otru añu de la mano d’Eduardo Cabra (ex Visitante de Calle 13) fixo surdir un primer temazu como lo ye Más animal, abondosu y ardiente, que va editase’l 14 d’abril baxo llicencia de Sony y del que nun duldamos que va namorar por igual a escépticos como a adeptos que celebren dende va tiempu ser partícipes de la causa.

Va selmanes Eduardo Cabra facía’l so cursu intensivu particular de vida rural asturiana con adaptación a la humedá y al fríu y somorguiamientu na cultura y la música d’Asturies, de Lleón y Zamora... Como remate a esi choque interestelar ente dambos seres humanos de lluz y creatividá estraordinaries, Rodrigo grababa nel mes de xineru d’esti añu la totalidá del álbum en La Casa del Sombrero, los estudios de Cabra en Puertu Ricu. Y podemos dicir que parieron una criatura esllumante, mui guapa, caldia, baillable y honesta.

Desque acabada la grabación del álbum, Rodrigo yá trabaya na creación del so espectáculu nuevu, qu’amás de nutrise de los cantares que formen el discu, va tar alimentáu pol rellatu y pol humor, pola crítica y pola ironía, pola denuncia intelixente y pola sensualidá marca de la casa, pol rigor y pola guapura, pol usu naturalizáu del asturianu y del castellanu como llingües vehiculares con una puesta n’escena que va romper cola imaxe precedente.

Vamos, polo tanto, a La Romería, un espaciu afayadizu pa la celebración y pa la comunión, un sitiu pa sentinos llibres de prexuicios, pa llatir soberanos y amantes, llibertinos y bonos nel sentíu más ampliu de la palabra bono.
Un show que se percibe estrovertíu, caldiu, ambiciosu, allegre, baillable y, quiciabes, épicu: mayor. Vémonos en La Romería, tán toes invitaes.