Trátase d’una obra teatral onde Juan Jesús Castellano, l’autor, homenaxa con cariñu, humor y ironía a tolos que nagüen por cambiar la so vida y tovía nun foron quién a ver los resultados esperaos. Reflexón sobre la incoherencia cola que vivimos los nuestros deseos y frustraciones.

Una demostración del poder que tenemos caún de nós pa facer realidá los nuestros suaños y... ¡velees! Un glayíu d’allegría pa ser quién a vivir, a poder ser, primero de morrer.

Una obra teatral satírica sobre’l conflictu ente lo que somos y lo que nos prestaría ser. Martín, una persona corriente, sacante la obsesión que tien de comunicase con Dios, llega a casa depués d’un día de trabayu, resignáu a siguir cola rutina diaria. Anque güei, esa rutina va alteriase por dalgunos detalles inesperaos.

Con momentos pa la reflexón dientro d’una montonera de situaciones perdivertíes, revélanos con claridá desenfadada les nuestres debilidaes y mieos. Una pieza de teatru texida colos filos finos de la psicoloxía más aguda sobre’l ser humanu y los sos esfuercios de contino pa ser recompensáu con lluz divino.