Circuitu de lliteratura

La artesanía del error ye un proyectu orixinal que se val de los paralelismos existentes ente poesía y música pa xenerar distintes converxencies emocionales, reconocer los puntos comunes y diferentes ente una y otra disciplina y establecer un diálogu activu col espectador onde la música nun ta a serviciu del testu nin el testu quier ser un instrumentu esplicativu de lo que ta sonando.

Nun ye una llectura poética pero… los testos son interpretaos por Gema Fernández, disparaos, secudíos y proyectaos directamente a los oyíos y los güeyos del públicu asistente. Nun ye un conciertu de música pero… hai cantares, cantares populares qu’abandonen temporalmente la so memoria y el so legáu históricu pa integrase nel contestu y les emociones que nesi momentu enllenen l’escenariu, rebautizándose, regalándose al poema. Too ello cola compañía de múltiples imáxenes y videos proyectaos que van actuar como complementu y soporte visual de les histories que se cunten.