El Centru Niemeyer presenta una esposición antolóxica sobre’l fotógrafu Gabriel Cualladó. La muestra, comisariada por Antonio Tabernero, propón una revisión de la obra d’ún de los grandes maestros de la fotografía española. Cualladó, que siempre se consideró a sí mesmu como amateur, tien una producción singular non solo pola so dimensión poética y pola so llibertá d’espresión tan estraordinaria, sinón tamién pola cenciellez natural cola que fixó la so interpretación del mundu.

A lo llargo de más de 140 obres, la esposición percuerre la trayectoria artística del fotógrafu, con especial insistencia nes décades de los 50, 60 y 70. Una parte de les obres con más fuercia y innovación fixéronse n’Asturies, ún de los sos escenarios fotográficos predilectos. La muestra dispón d’empréstamos de colecciones importantes, como’l Muséu Nacional Centru d’Arte Reina Sofía, el Muséu Nacional Thyssen-Bornemisza, l’Institut Valencià d’Art Moderno IVAM, la colección Mur o la Fundación FotoColectania, amás de la colección de la familia Cualladó.