Play Roma ye una maqueta fecha con material reciclao y técnica 3D, onde, al traviés de figures Playmobil, recréense momentos y escenes de la romanización y de les guerres astur-cántabres. La exposición cunta con milenta detalles, que van llevar a pequeños y a mayores a ún de los momentos históricos más importantes d´Asturies, les campañes militares romanes contra los astures, momentu nel que se construyó la Vía Carisa, la primer y principal vía de comunicación romana d´Asturies.

Nel diorama represéntense escenes tales como l´avance de les tropes, la formación de la tortuga qu´usaben les lexones romanes en combate y, especialmente, nos asedios, la minería, les termes, los campamentos romanos, etc. Tamién hai un espaciu dedicáu a los ástures, onde s´amuesen los castros, l´agricultura y la siega, ente otros. Dalgunes de les escenes tán articulaes con movimientu, lo que les fai más espectaculares tovía.

Amás, los visitantes van poder participar nel xuegu en busca del click doráu, yá qu´ente toles escenes escondiéronse 5 clicks. Los más finos que consigan atopalos, van poder enllenar una papeleta indicando´l sitiu onde s´alcuentra caún d´ellos y echala nel buzón puestu na recepción del Centru. N´acabando la esposición, va facese un sortéu de tres xuegos de Playmobil de temática romana ente tolos participantes.