El ritmu y les lletres de los cantares de Susana al pie de la maraviyosa hestoria de Los siete naninos.

El resultáu ye esti musical allegre y pedagóxicu del que van poder esfrutar grandes y pequenos. Una versión distinta que caltién la esencia del cuentu de los Hermanos Grimm. Equí la güelina Asunción rellátanos un cuentu que fala de siete naninos que vivíen nuna viesca y qu’un día al volver de los sos llabores atopen na so cabana una moza dormida al llau d’una maleta. Nun saben como reaccionar, anque bien llueu van dase cuenta de l’allegría qu’entró nes sos vides. Tamién hai un personaxe (la bruxa Paca) que, con falcatrúes y maldaes, va tentar de frañir esta amistá qu’acaba de ñacer y qu’atópase reflexada nel cantar principal (Los mios siete naninos) d’esti espectáculu pa toa familia.