Circuito de cultura tradicional asturiana

V.O.S ye l’últimu discu de L-R.  La xira V.O.S. ye un ciclu de conciertos que quier presentar esti proyectu al traviés d’un espectáculu que mez música, lluz y imaxen.

¿Cómo suenen los llugares? ¿Cómo representamos y identificamos esi soníu? ¿Cómo ta representáu na nuestra memoria colectiva? ¿Cunta la nuestra historia? ¿Yera esi soníu inmóvil, alfa y omega de la nuestra identidá, o yera móvil, cambiante, subversivu...?

Esti discu llámase V.O.S., por vosotrxs, porque ensin xente pa imaxinala la música nun diba tener sentíu. Pa nós V.O.S. axunta tres conceptos importantes: “versión”, “orixinal” y “subtitulada”. Esti discu fala dende la voz de los sitios y los montes; fala dende la musicalidá de les pantasmes y los símbolos. Nós, dámosvos dellos “subtítulos” pa que vosotrxs mesmxs imaxinéis esa “voz ensin nome” irrepresentable que ta bien dientro de la nuestra memoria colectiva.