Ampudia ye ún de los apellíos de Don Aurelio de Llano Roza y Ampudia. Inxenieru, arqueólogu y escritor asturianu (Caravia 1869-1936) cofundador del Real Centro de Estudios Asturianos y consideráu por munchos como’l padre de la etnografía n’Asturies. Autor d’ente otros munchos, del llibru Del Folclore Asturiano. Mitos, leyendas y supersticiones, obra perimportante pal folclor d’Asturies y pegoyu cimeru nel que se sofita esti espectáculu.

Diarios d’Ampudia ye un espectáculu de baille y música tradicional, escritu y dirixíu por Luis Ángel Fdz Santos, nel que la hestoria, el teatru, les artes escéniques y los audiovisuales entemécense pa somorguiar al espectador nun viaxe sensorial y multidisciplinar a traviés de la identidá asturiana. Un viaxe que va percorrer Asturies na dómina los años 20, afayando una bona riestra de bailles, cantares y tradiciones que’l propiu Aurelio recoyó y documentó nel so trabayu.