En payares vuelve a Llaboral Ciudá de la Cultura una edición nueva d’Escena en Rede; un alcuentru profesional que nel 2025 llega a la tercer edición y que va volver cuntar con una programación d’espectáculos variada, equilibrada y atrayente, delles acciones formatives profesionales, meses de debate y momentos pensaos pa establecer alcuentros comerciales. Una de les acciones formatives va tratar sobre incentivos fiscales y, amás de cuntar con una sesión presencial nel marcu de la muestra, compleméntase con esti webinar previu.

L’aplicación correcta de los incentivos fiscales dexa a los productores d’artes  escéniques, y tamién a los del sector musical y audiovisual, llegar a fontes nueves de financiamientu priváu, impulsando los sos proyectos col sofitu d’un marcu xurídicu sólidu.

La Conseyería de Cultura, Política Llingüística y Deporte del Principáu d’Asturies, en collaboración cola Asociación d’Empreses d’Artes Escéniques d’Asturies EscenAsturies, entama una xornada onde van poder descubrise les claves xurídiques, fiscales y operatives d’esta fórmula de financiamientu cultural, con casos prácticos y modelos de xestión.

FUNDAMENTU

L’oxetivu de la sesión ye averar a los productores teatrales d’Asturies ferramientes útiles pa financiar los sos proyectos al traviés de los mecanismos fiscales previstos na Llei del Impuestu sobre Sociedaes. Propónse una sesión en formatu webinar adaptada al panorama escénicu asturianu y diseñada sobre manera pa compañíes con estructures pequeñes o medianes, que puedan tener interés en beneficiase de los incentivos fiscales y conocer la manera de solicitalos.

PROGRAMA:

• En qué consisten los incentivos fiscales a la producción d’espectáculos (art. 36.3 Llei del Impuestu sobre Sociedaes).

• Cómo pueden llograr financiamientu con aportaciones de terceros inversores (art. 39.7 Llei del Impuestu sobre Sociedaes).

• Qué requisitos han cumplise y qué plazos hai que tener en cuenta.

• Qué pueden facer les compañíes interesaes pa preparar una posible operación de financiamientu sobre la base de los incentivos xeneraos nel 2025.

Amás, va establecese una canal de comunicación onde los asistentes van poder formular duldes, recibir orientación o valorar si los sos proyectos podríen encaxar en dalguna operación d’esta clas.