Ye’l primer día de la primavera y Olivia vuelve al xardín a velu nacer y a llimpiar los restos que dexó l’iviernu. Pero Olivia nun ta sola, nesti xardín florecen les alcordances semaes xeneración tres xeneración poles muyeres de la familia.

¿Cómo vivimos la perda? ¿Ónde van los nuesos seres queríos cuando finen? ¿U queda lo vivío? Son dalgunas de les entrugues qu’anicien esti espectáculu. Trátase d’un proyectu que busca falar de la perda con tenrura y naturalidá. Y non sólo de la perda, sinon de la vida y lo que semamos n’ella. Trátase de crear un espaciu d’alcuentru pa la emoción y paranos a recordar dende l’amor. Un viaxe al traviés de les ausencies y del pasu del tiempu.