Monólogu disruptivu pa seres inquietos, narráu baxo l’influxu de la Lluna.

Como les marees de la mar, la Lluna avéranos y allóñanos, moviendo la nuestra historia y les nuestres histories, como mueve l’agua. Muncho primero de que’l cosmonauta soviéticu Gagarin s’averare a ella un poco más, y primero de que l’estaunidense Neil Armstrong imprimiere sobre la so superficie primitiva la primer büelga imperialista, la Lluna yá yera nuestra. Siempre foi testigu, musa y espeyu de la humanidá: a la vez home y muyer, muerte y vida, orixe y destín.

Esti monólogu p’adultos, vehiculáu pola narración oral, convida formalmente a persones intrépides y importones a dexase llevar nesti fluxu y refluxu de cuentos, mitos y lleendes que nos tresporten dende Roma a Etiopía, de Grecia a Panamá. Acompáñame a esplorar la Lluna erótica y romántica, terrorífica y reveladora; una lluz que, en cada marea, pue desvelar tanto lo absurdo como lo fondo.

Faite llunáticu, o dexa que la Lluna te convierta nún.