Esta conferencia atópase enmarcada nel ciclu de conferencies “La producción láctea n’Asturies: Evolución hacia’l Retu Circular 2030”. Ciclu de conferencies que se desenvolvieron nel mes de abril coordinaes por D. Juan José Mangas Alonso y D. Tomás Emilio Díaz González, miembros numberarios permanentes del RIDEA..

La tendencia a establecer ciclos de desarrollu y tresformación qu’optimicen l’usu de los recursos y fomenten la eficiencia de los sistemes productivos, fai posible maximizar los recursos disponibles, qu’éstos queden el mayor tiempu nel ciclu productivu y reduz la xeneración de residuos. Con eso ayúdase a eliminar les esternalidaes negatives de l’actividá económica, al tiempu que se garantiza’l so crecimientu, un mayor bienestar de les nuestres sociedaes y la preservación y meyora del capital natural. No referente a la nutrición animal, amás de considerar los alimentos en términos de producción eficiente, tien en cuenta la so viabilidá pa promover la salú animal y humana y satisfacer les demandes del consumidor en términos de calidá y seguranza de los alimentos, posibilitando l’usu de la dieta como vehículu pa la inxestión de nutrientes favorables pa la prevención y control d’enfermedaes, conexones qu’impliquen una formación multidisciplinar, dacuando mui difícil de llograr. La tecnoloxía de la espectrofotometría de reflectancia nel infrarroxu cercano (NIRS), que na actualidá encuadraríase dientro de la definición de “Smart sensors”, ye una ferramienta imprescindible que cada vez s’atopa más implementada, ente otros, nel sector agroalimentariu, pal so usu nel control de calidá d’alimentos y productos animales. Esto ye consecuencia de los principales atributos que la caractericen: a) alta velocidá de respuesta, b) baxu coste analíticu por muestra, c) facilidá d’usu en rutina, d) carácter non destructivu y versatilidá pal análisis de mui diversos productos y parámetros, e) elevada reproducibilidá y repetibilidá, f) nun produz residuos al ser una técnica llimpia que nun utiliza reactivos y g) pue incorporase en llinia/in situ y asina posibilitar l’análisis a gran escala. Nesta conferencia van esponese los resultaos de les actividaes d’I+D+I llevaes a cabu nel SERIDA, cola aplicación de la tecnoloxía NIRS, nel control de calidá d’alimentos y productos animales, igual que la incorporación de sensores NIRS pa la meyora de la xestión y la toma de decisiones n’esplotaciones.

Conferencia impartida pola Dra. Begoña de la Roza Delgado. Investigadora responsable del Programa de Valor Nutritivu del SERIDA .