Circuitu d´actividaes de cultura tradicional asturiana

L´aprovechamientu estacional del pastu d´altura dio pie a cientos d´asentamientos de pastores que s´esparden a lo llargo de los montes asturianos: les brañes. Dependiendo de les característiques xeolóxiques de los asentamientos, de la topografía y de les distintes tradiciones constructives, les brañes conformen paisaxes humanizaos d´una potencia estética y interés cultural bien grande: pastores del oriente que dende´l Neolíticu entamaron el camín pa dominar la peña, habitaron un universu de piedra caliar colingando les sos mayaesde sitios inverosímiles y punxeron nome a cada piedra, a cada cortada, a cada cambiu de lluz… y d´esta manera poblaron el paisaxe de h.ous, deventíos, cuenyes, llambries, h.itos... Vaques, oveyes y cabres constituyeron la so facienda y de la so producción supieron sacar, depués de sieglos d´esperiencia, los meyores quesos del mundu. Vaqueros del cordal y vaqueiros d´alzada que llabraron carbes y grandes pa estender los sos praos infinitos peles fasteres del monte. Brañes primaliegues, brañes estivales, ivernales, alzaes... coles sos arquitectures de vellares, cuerres, teitos y tendayos... güei namás son un reflexu d´un mundu anterior pobláu y precisu, que va andando adulces camín del silenciu.