Circuitu d´actividaes de cultura tradicional asturiana

L´horru asturianu, iconu del país, aisitáu aparentemente fuera del tiempu pa munchos, tuvo sometíu al dir y venir de la modernidá. Sobre los sos lliños y cureñes guarda´l reflexu llonxanu de los grandes movimientos artísticos que ximelgaron Europa dende la Edá Media: románicu, clasicismu purista, barrocu, pintoresquismu…, elementos d´estilu qu´apaecen entemecíos discretamente con una iconografía ancestral qu´al traviés d´esquemes máxicos que paecen venir de la Edá del Fierro faen por esplicar el funcionamientu del mundu. Mandales qu´atrapen les fuercies de Bien pa protexer “l´arca sagrada del pan”, salvaguardando la collecha y garantizando la continuidá de la comunidá campesina. Aparte d´esta funcionalidá esencial, maestros carpinteros y élites rurales, artesanos y vecerps, axuntaron voluntaes creando conxuntos decorativos d´un atractivu estéticu bien grande pa –como en cualquiera de les artes- buscar l´harmonía, disfrutar de lo guapo y trescender la so memoria.