Circuitu d’artes escéniques

“¿Qué une a unos paisanos qu’abeyen a mil y milenta quilómetros l’ún del otru? ¿Qué conexón escura y fonda? ¿Qué llazu indisoluble y sentimental los caltién ataos pa tola vida, con un sentíu de pertenencia, con un vínculu irremediable que nun va romper xamás? Que son asturianos”.

Asina empieza’l planteamientu d’El chigre menguante, a partir de cinco intérpretes que nos ayuden a vivir y empatizar cola vida y el sentir asturianos. Dende la democracia hasta anguaño reflexonamos cola forma de ser de l’asturiana y l’asturianu, de les families, del foriatu, del gallu, del babayu, del grandón, del repunante…

Refléxense, dende la elegancia de los personaxes presentaos por Maxi Rodríguez, los tiempos de gloria y de crisis del Principáu d’Asturies, pero siempre dende la opinión d’esi local humilde que n’Asturies llamamos "chigre". El sentir propiu d’Asturies vívese dende’l chigre, el sitiu común pa tolos sos habitantes, y asina queda reflexao convirtiendo cualquier teatru d’Asturies, d’España y del mundu nun “chigre menguante”.