Esta esposición supón la recuperación de la figura de Manuel Morilla Muñiz (Tinéu, 1930 – Xixón, 2009), fotógrafu amateur de trayectoria curtia pero perinteresante, tal como atestigüen el conxuntu d´imáxenes qu´agora se muestren. El periodu d´actividá fotográfica de Morilla espárdese, aproximadamente, dende l´añu 1955 al añu 1963.

Anque Morilla abandone al pocu tiempu l´actividá fotográfica, el conxuntu d´unes 250 imáxenes que se caltuvieron y qu´agora, gracies a l´arrogancia de la so familia, pasen a formar parte de la colección permanente del Muséu, dexen apreciar la calidá algamada pol fotógrafu. Les imáxenes son sobre manera retratos del so círculu familiar más averáu, anque tamién atopamos retratos escelentes d´amigos como Rubio Camín, Navascués, Trinidad Fernández o´l propiu Gonzalo Juanes. Artistes que dexen patente la existencia en Xixón a lo llargo d´esos años d´un grupu de creadores inquietos y con conexones colos grupos más interesantes del panorama artísticu nacional.