L’humorista Joaquín Pajarón, iconu na comedia asturiana contemporánea, desembarca nel Teatru de La Llaboral con Aquí… Supercentráu, el so últimu monólogu. Un espectáculu de dos hores de duración enllenu de situaciones cotidianes, esperiencies vitales y reflexones sobre’l mundu llevaes enriba de les tables al traviés de la narración perdivertida del showman uviedín.

Depués del éxitu d’En demasía, espectáculu col que visitó ciudaes como Madrid, Santander, Bilbao, Llión, Pamplona, Pontevedra o Zamora, Joaquín Pajarón lleva a Avilés la so creación nueva, Aquí… Supercentráu, un espectáculu d’humor basáu nel formatu “stand up comedy”, onde’l cómicu conecta dende’l minutu ún col públicu p’apega-y la risa nuna escenificación que nun escaez el toque asturianu en cada detalle.