El títulu tan evocador d´esti conciertu provién d´una metáfora lorquiana, que llama a les cuerdes de la guitarra seis doncellas que bailan. Un recital onde se van poder ver y escuchar exemplos de cómo se rellaciona la lliteratura cola música pa guitarra al traviés d´una de les figures lliteraries más importantes a nivel internacional: Juan Ramón Jiménez. L´escritor conviértese na exa que-y da sentíu a esta aunión de palabra y música.

Dientro del repertoriu que se va interpretar vamos poder escuchar la Elegia di marzo, del compositor recién fináu Angelo Gilardino; dos fragmentos d´El amor brujo, de Manuel de Falla; una creación de Pablo Despeyroux; los Preludios Epigramáticos (1981-1983) de Leo Brouwer, inspiraos en versos de Miguel Hernández y, pa rematar, movimientos de Platero: el Platero de Mario Castelnuovo-Tedesco.

El dúu singular formáu por Silvia Nogales (guitarrista) y Esther Acevedo (actriz y coreógrafa) naz nel 2014, frutu d´un proyectu d´investigación fechu por Silvia que remata nesta curiada y sensible inmersión lliterario-musical de trayectoria llarga y sonadía.