Manon de Jules Massenet

Uviéu, 10/09/2023 19:00

Música

Manon de Jules Massenet
Uviéu

Díes 10, 12, 14, 15 y 16 de setiembre de 2023

Temática: ópera cómica

Dirixío pa: tolos públicos

Duración: 180 minutos

Teatru Campoamor

33003 Oviedo / Uviéu

T: 985 20 75 60

Más información

Precio: entre 10 y 188 €.  Descuento para socios del Pasaporte Cultural

Manon de Jules Massenet inaugura en setiembre´l ciclu llíricu del 2023/2024 de la Ópera d´Uviéu, que sigue festexando los 75 años d´historia operística na nuestra ciudá na so segunda etapa. El títulu escoyíu nun ye casual, porque foi´l mesmu col que llevantaba´l telón el 18 de setiembre de 1948 el Teatru Campoamor depués de les obres de reconstrucción del coliséu ovetense. Va 75 años integraben el repartu d´aquella función inaugural artistes como Victoria de los Ángeles, Giacinto Prandelli o Manuel Ausensi, que-y dieron un brillu especial a esta efeméride.

La música de Manon, primer títulu de la temporada actual, conforma una serie de imáxenes romántiques de la vida. Con esta ópera Massenet quería facer un monumentu al rococó francés en contraposición al mundu del Ancien Régime. Ye xustamente un cuadru del primer rococó pintáu por Antoine Watteau, L´indiferente (1716), el qu´inspira a Emilio Sagi la so puesta n´escena. El compositor, consideráu´l más importante del país galu del sieglu XIX, aprovecha´l testu de Meilhac y Gille p´adaptalu con una agudeza, un llirismu y una poesía inimitables.

El montaxe que vamos ver nel Campoamor ye una producción de la Ópera d´Uviéu, el Teatru Municipal de Santiago de Chile y la Ópera de Tenerife. El director portugués Nuno Coelho dirixe la obra y debuta nel fosu del Campoamor al frente de la OSPA, de la que ye´l director titular nuevu dende la seronda del 2022. Emilio Sagi encárgase, como yá comentemos, de la escena con un repartu encabezáu por Sabina Puértolas, Celso Albelo y Roberto Scandiuzzi, ente otros. Completa la producción el Coru Titular de la Ópera d´Uviéu (Coru Intermezzo), dirixíu pol so director Pablo Moras.