Nesta ocasión la muestra propón un averamientu a los trabayos de los creadores mozos con un oxetivu doble: per un llau, esparder la riqueza y pluralidá d’estudios artísticos impartíos na Escuela d’Arte d’Uviéu y, per otru, mostrar el nivel profesional tan altu de caúna de les propuestes d’estos estudiantes, el so rigor técnicu, la so cultura plástica y sensibilidá.

Son trabayos de toles especialidaes vinculaes a los ocho Ciclos de Grau Superior d’Artes Plástiques y Diseñu pertenecientes a estes families profesionales: Artes del Llibru coles especialidaes d’Edición d’Arte y de Grabáu y Técniques d’Estampación. Artes Aplicaes a la Escultura cola especialidá Escultura Aplicada al Espectáculu, Comunicación Gráfica y Audiovisual coles especialidaes de Gráfica Impresa, Ilustración y Fotografía, y Diseñu d’Interiores coles especialidaes d’Amoblamientu y Arquitectura Efímera.