La esposición Un país súperpoblado. Estampas de Picasso propón un percorríu escoyíu pela obra gráfica d´ún de los grandes xenios de la historia del arte y, en particular, de la historia del grabáu occidental. Nuna producción escomanada como la de Pablo Picasso (Málaga, 1881 – Mougins, 1973), el trabayu que desenvolvió a lo llargo de tola so vida nel mediu gráficu ye un paradigma verdaderu de los sos intereses estéticos, que reflexó con vehemencia y precisión singulares, y del so virtuosismu técnicu, patente na investigacón de les posibilidaes espresives de los procedimientos d´estampación.

Les 22 estampes que formen la muestra –procedentes nos más de los casos de colecciones particulares– ofrez una visión evolutiva del Picasso grabador qu´abarca dende los sos inicios nesti mediu hasta les sos últimes estampes. Dientro d´esta escoyeta sobresalen obres procedentes de los conxuntos gráficos principales del artista, como la Suite Vollard (1930 – 1937), la Suite 347 (1968) y la Suite 156 (1970 – 1972).