La gaita n’Asturies: del Gaiteru de Lliberdón al Conservatoriu de Rodrigo Joglar
Cabranes, 19/08/2024 20:00
Cultura Tradicional
Circuitu de cultura tradicional asturiana
Temática: conferencia sobre música tradicional asturiana
Dirixío a: tolos públicos
Duración: 90 minutos
¿Cuál ye’l futuru de les bandes de gaites n’Asturies? ¿Qué papel xueguen les comunidaes asturianes nel esterior na difusión de la música tradicional? ¿Qué víes existen pa la profesionalización de les gaiteres y gaiteros asturianos nel sieglu XXI? La gaita y el conservatoriu: ¿camín de futuru o saltu al vacíu?
La conferencia La gaita n’Asturies: del Gaiteru de Lliberdón al Conservatoriu propón una esposición en dos bloques:
De primeres, una introducción curtia a manera de percorríu históricu dende les hipótesis plantegaes como orixe de la gaita a nivel global hasta les primeres manifestaciones del instrumentu n’Asturies, pasando per dellos momentos relevantes de la historia de la música de gaita nel sieglu XX.
Nel segundu bloque preséntase una visión personal del estáu de la cuestión anguaño no tocante al instrumentu: la enseñanza, les bandes de gaites, la profesionalización o la importancia del papel de la muyer o de la emigración asturiana, ente otres cuestiones.
Esta conferencia quier crear un espaciu de debate y intercambéu d’idees sobre’l presente y el futuru de la gaita y de la música tradicional n’Asturies.
