Elles suenen/Ellas suenan ye un conciertu fechu con un conceptu innovador de música clásica y barroca, diseñáu en reconocimientu a l’aportación de les muyeres na Historia del Arte.

Gracies a la selección musical, danse a conocer les histories de llucha y superación de les protagonistes: músiques, virtuoses, mecenes, instrumentistes, compositores... Caúna d’elles representada n’escenariu históricu, contextualizada pente medies de les notes nel programa de mano (físicu o dixital) y les introducciones orales previes a la interpretación de cada pieza del programa, aportando datos históricos, anécdotes y trazando paralelismos colos nuestros díes qu’ayuden a empatizar y esfrutar de la esperiencia d’una manera más completa, tanto dientro como fuera de la parte más estrictamente musical.