Circuitu de lliteratura

Una sesión pa tola familia qu’incluye un alcuentru lliterariu col autor David Acera, onde va presentar ¿Por qué los pájaros no tienen rey?, la so última obra.

Na primer metá de la sesión, Acera va falar sobre’l procesu creativu y l’arte d’escribir pa tolos públicos, narrando, de siguío, la historia que-y va valir al empar p’abrir pasu a la segunda parte de la sesión, que va ser una conferencia dialogada sobre trés de les especies principales de páxaros que viven nes nuestres ciudaes: el gurrión, l’andarón y l’estornín.

Al traviés de semeyes, vídeos y la voz de David Acera vamos ver les ciudaes y pueblos como ecosistemes poblaos por más animales que los humanos, ecosistemes que pueden volver naturalizase y ufiertar más posibilidaes pa la medría de la so biodiversidá. Tamién vamos falar sobre los páxaros como fonte d’inspiración pal arte lliterariu.