Dende Llaboral Cinemateca creemos fundamental non solo contribuyir a la consolidación de les trayectories de cineastes yá esperimentaos, sinón tamién valir d’apoyu al llanzamientu de carreres y miraes nueves. Cola nuestra esperiencia y recursos, contribuyimos al desenvolvimientu de xeneraciones nueves de cineastes procedentes d’Asturies, favoreciendo la incorporación del talentu mozo a la familia del cine asturianu. Esta escoyeta namás ye un muestrariu pequeñu de delles de les voces nueves y miraes del cine asturianu contemporaneu, y tenta de poner el focu nun grupu de cineastes emerxentes qu’empiecen a dar los sos pasos nel mundu profesional.

Duración: 71 min.

Idioma: V.O. n’español, asturianu, árabe, francés y inglés sotitulada n’español

Ficha completa

El diañu, de Samuel Ferrandi

Duración: 9 min

Un mineru llamáu Xuan Vallina alcuentra na castañal un caballu estrañu blancu con una mancha negra na frente. Nun sabe que ye’l Diañu Burllón de los cuentos nos que yá naide cree.

Sin pausa, de José Cachón 

Duración: 14 min

Dicir que non a un trabayu nunca ye fácil, y menos si la to familia y el xefe de la empresa muestren más ilusión que tu. Pedro enfréntase al so primer trabayu como pinchadiscos de bodes y eventos na empresa Sin Pausa.

La sonrisa de los maniquís, d’Asur Fuente

Duración: 18 min

Dellos maniquinos abandonaron los sos escaparates. Un ensayu visual sobre la (in)felicidá humana.

Gniele baila, d’Ana Izarzugaza

Duración: 14 min

Denomínase Fuera de campu “a cualquier personaxe, oxetu o acción que nun se ve na pantalla, pero forma parte de la escena”. Un rellatu sobre muyeres, migraciones y pueblos abandonaos, sosteníos por una baillarina tenaz. Gniele bailla mientres el mundu ocurre, dientro y fuera de campu.

No Jungle!, de Carmen Menéndez

Duración: 16 min

Un grupu de refuxaos sirios vive nel únicu campamentu improvisáu en Calais acullá de les llendes de la “Jungla”, el mayor asentamientu de refuxaos n’Europa sobre’l que les ONG denunciaron vulneraciones series de los derechos humanos nes condiciones de vida de los sos habitantes. Caltienen la esperanza de cruciar a Inglaterra al mesmu tiempu que seres queríos muerren nel intentu. Les sos espectatives sobre Europa choquen cola realidá cuando les autoridaes locales traten d’impone-yos la “Jungla” como alternativa única.

La programación cinematográfica ufiertada por Llaboral Cinemateca ta coordinada pol Festival Internacional de Cine de Gijón/Xixón (Divertia Gijón SA)