Un espectáculu onde los dos artistes asturianos, Chus Pedro y Pipo Prendes, faen un repasu musical al repertoriu que se cantó siempre nestos ambientes asturianos, tanto mineros como nos de la mar. Hai cantares nuevos, cantares de siempre, música tradicional, esencia de chigres y de los diversos paisaxes de la nuestra tierra. Nel escenariu tán acompañaos polos músicos: Gabino Antuña, pianu y teclaos; Fernando Pérez Vega, guitarra; Julio Sánchez, batería, y Óscar Santos, baxu. Dende esa talaya que ye la esperiencia de tantos años cantando, tantos discos editaos, tantos recuerdos que nos dexen viaxar al traviés del tiempu, Chus Pedro y Pipo xunto al so equipu disfruten cantando y siguen, como siempre, dispuestos a emocionar dende los conciertos de La mina y el mar.