12 de marzo, 17:30 h y 21:00 h.

Cuando vi al mio fíu andar por primer vez depués de meses de cayíes, d´ intentos fallíos, de güelpes y vuelta a probar, entendí qu´un día toos fuimos esa fuerza que´l tiempu fai qu´olvidemos. Los neños son los seres más auténticos que te pues atopar, son salvaxes, son la ternura n´esencia y tán enllenos d´una verdá insultante, nun tienen mieu a equivocase, son llibres y expresivos y tolo que facen ta enlleno d´arte. Si mires pa un neñu entiendes casi tolo que fuisti y va un tiempu que nun te dexes ser.

Esta xira ye´l resultáu de ver crecer al mio fíu, ye´l resultáu del mio crecimientu al so llau, ye toos esos sonidos y melodíes qu´intenten da y forma a lo que sentí y m’inspiró él y la vida al traviés d´él. Ye un alcuentru col neñu que nun pudi ser y que suañaba con ser. Ye un homenaxe a esos seres que son tan llibres como un páxaru llibre. Esta xira ta enllena de dinosaurios, calamares robóticos, máquines del tiempu, pianos voladores y mimos billingües, esti discu ye eso que yo olvidara y que ye tan poderoso; la Maxa d’atopar cada día y cada sienda fascinantes, traigan lo que traigan.