Tiense o nun se tien. Y a Johny sóbray: hai coses que nun se puen aprender nin finxir. Dedicar una vida entera al rock and roll, a escribilo, interpretalo, metese nél ensin salvavides y sobrevivir pa cuntalo y cantalo. Johnny Cifuentes, Johnny Cocodrilo, Johnny a seques o Johnny Burning, llámenlu como quieran más, ye un foraxíu curtíu en mil batalles, en nueches infinites de rock y desenfrenu, dalguién que, sicasí, caltién la enerxía y la pasión necesaries pa embarcase nuna aventura nueva. Titulada Hagámoslo. Atarriquitada de canciones eScelentes, capítulos independientes qu´encaxen ún con otru con precisión milimétrica. La primer aventura qu´entama en solitario, auque mui bien acompañáu por un grupu de vieyos amigos, de paisanos como él, dispuestos a protexer con uñes y dientes les sagraes escritures del rock and roll vieyu y bonu.

Depués de más de cuatro décades defendiendo el llegáu Burning, nome paradigmáticu de la historia de la música d´esti país, formación yá mítica qu’anduvo centenares y centenares d´escenarios pa ufiertar, siempre, velaes inolvidables, Johnny decidió pasar páxina ensin escaecer los oríxenes. Yera´l momentu afayadizu, y atopare un compañeru nuevu d´aventures, un Nico Álvarez que, amás de poner guitarres increíbles que s´amiesten a la perfección colos soníos enxendraos pol tecláu y les cuerdes vocales de Johnny, coproduz xunto a él l´álbum.