Quique González presenta´l so discu nuevu, Sur en el valle (Cultura Rock / Varsovia Récords, 2021), títulu inspiráu nesi vientu famosu en tola cornisa cantábrica, portador de socesos y comportamientos insólitos y al que s´asocien lleendes de tou tipu. Siempre hai un espaciu pa lo imprevisto cuando sopla´l sur, un daqué de misteriu que s´estiende tamién a dellos pasaxes d´esta colección de cantares.

Sur en el valle, grabáu en payares del 2020 en La Casa Murao y producíu por Toni Brunet, ye un discu reposáu y de tragu llargu, más reflexivu que narrativu, nel que la naturaleza y los escenarios condicionen el diálogu interior que fila estos 11 cantares nuevos (y una pista escondia). Tien un soníu orgánicu, directu y una enerxía contenida que remana una banda fantástica que pon atención especial a les dinámiques. Un poco más alloñáu de los soníos a l´americana d´otros discos de Quique, Sur en el valle busca paisaxes sonoros nuevos y da mayor protagonismu a instrumentos acústicos como´l contrabaxu y la guitarra clásica. Acústiques vieyes Gibson, Wurlitzer y Hammond y bateríes elegantes acompáñennos tamién nesti viaxe.

Escritu lo más d´él l´añu pasáu dientro d´una furgoneta vieya GMC Vandura aparcada no cimero d´una llomba, ideal pa escuchalu al conducir y sentir que´l vientu sur bríndanos más preguntes que respuestes.