El Paraninfu de la Llaboral acueye la proyección d´esta película d´Oskar Alegria enmarcada na sección Estaciones de Laboral Cinemateca.

Un oxetu preciosu y precisu. Asina definía Luis Martínez en El Mundo a Zumiriki con motivu de la so presentación en Venecia. Zumiriki (que n´euskera significa islla en centru´l ríu) ye, por cierto, una esperiencia. L´alcuentru evocador d´un home col pasáu, col monte pel qu´enredaba de neñu y onde´l padre rodaba películes en súper 8. Y ye tamién evocadora, cómica y didáctica. La historia d´un náufragu aislláu na viesca del Pirineu navarru durante cuatro meses, d´una persona que tien como oxetivu reconectar cola naturaleza y cola so infancia. El director de Venecia dixo na presentación del Festival que Zumiriki yera incalificable y sorprendente. Tanto qu´esi calificativo últimu acutábalu namás pa ella y pa nenguna otra película más d´esa edición.

Esta sesión inclui un alcuentru col director de la película, Oskar Alegria.