Lope de Vega, hedonista lliteratu, repasó en La Dorotea, una de les sos obres más queríes, la so trayectoria xuvenil. Nella, él mesmu da pa sigo´l papel protagonista. Lope revive la que foi una de les sos relaciones más tormentoses, que lu marcó pa tola vida: el so gran amor, Elena Osorio, cola que tuvo una relación de cinco años, y que foi separtada violentamente de los sos brazos. Esti fechu espertó la roxura del poeta y llevólu a múltiples vicisitúes.

Mientres Lope redacta les sos obres de madurez y recuerda les aventures sentimentales vivíes, la so fía pequeña, Antonia Clara, tamién va esperimentar un procesu de rebelión ¡de tal palu, tal estiella!. El padre va tener que´apechugar con ello, acompañáu pola so ama de llaves y muncho más Lorenza Sánchez.

Lope y les sos Doroteas fala de la vida y de la muerte, del amor y del celestinéu, del relevu xeneracional, del llabor creativu y del panorama cultural del XVII. Na obra tán presentes relevantes personaxes na vida del dramaturgu: el duque de Sessa, el nuevu Calderón, el rei Felipe IV, l´inxenieru Cosimo Lotti, Juana de Guardo, sor Marcela de San Félix, Marta de Nevares y don Cristóbal Tenorio, pretendiente de la fía menor y supuesto raptor. ¡Y ye que, na casa madrilana del autor, va montase la mayor de les comedies!