La historia d´una ciudá ye la de la xente que la habitaron, y el so llegáu queda nella como les llinies nuna mano. José Ramón López Suárez, Moreno, dexó la so marca n´Avilés a través de la obra tan estensa que tien, na que retrataba les calles de la villa, onde columnes y soportales apaecen xugando coles lluces y solombres y les persones, cuando anónimes, cuando ilustres avilesinos y avilesines, tamién foron oxetu del so pincel maxistral.

Moreno, anque nacíu en Xixón, foi avilesín d´adopción, desenvolviendo na nuestra ciudá tola so etapa creativa, sumándose a nomes como Fernando Wes, Santarúa, Espolita y Soria ente otros, que contribuyeron a conformar la identidá cultural d´Avilés.