Noticies
Cultura entama’l IV Reguerada Fest del 14 al 16 de payares en Candás
Cultura en Rede
Ferla Megía y Herbamora van poner música al festival, que tamién cunta con actividaes empobinaes al públicu infantil y juvenil
Los detalles de la programación, coordinada por Xaime Martínez, tán disponibles na web asturiesculturaenrede.es
La Conseyería de Cultura, Política Llingüística y Deporte entama la cuarta edición del Reguerada Fest los díes 14, 15 y 16 de payares en Candás. Esta mañana’l director xeneral d’Acción Cultural y Normalización Llingüística, Antón García, presentó esti eventu, que col so nome rinde homenaxe a Antón de Marirreguera, nacíu nel conceyu de Carreño y autor de la que se considera la primer obra lliteraria conservada n’asturianu.
Una feria, charles, recitales lliterarios, visites guiaes, conciertos, talleres y actividaes pa tolos públicos formen parte d’esti programa, que supón un puntu d’alcuentru alredor de la cultura, gastronomía y el mundu empresarial n’asturianu. La Fábrica d’Ortiz va acoyer les más de les actividaes del festival, incluyíu’l mercáu, feria de llibros y empreses, onde van participar una ventena d’entidaes.
A lo llargo de les trés xornaes va haber espaciu pa charrar sobre la oralidá, la empresa o la escritura na cultura asturiana, pa disfrutar de la poesía en dos recitales y pa participar nos talleres sobre baille tradicional o cerveza artesano, nun showcooking o en visites guiaes per Candás.
Ferla Megía y Herbamora van poner música al Reguerada Fest, que tamién cunta con actividaes empobinaes al públicu infantil y xuvenil, con talleres sobre llinguaxe cinematográficu, creación de xuegos de mesa o lliterarios, un cuntacuentos y la representación del espectáculu Al rodiu’l horru d’É Vero Teatro.
Toles actividaes son gratuites. Los detalles de la programación, coordinada por Xaime Martínez, tán disponibles na web asturiesculturaenrede.es, onde tamién se pueden retirar les invitaciones pa participar nes actividaes con tope de places.